मालीमा विद्रोहीको आक्रमणमा परी ३० सर्वसाधारणको मृत्यु

काठमाडौं
संचार गृह/ शनिबार, फाल्गुन ३, २०७६

अफ्रिकन देश मालीमा भएको आक्रमणमा ३० जना सर्वसाधारणको मृत्यु भएको छ । हतियारधारी विद्रोहीहरुले गाउँमा आक्रमण गरेर स्थानीयको हत्या गरेको बताइएको छ ।

आक्रमणकारीले स्थानीयको हत्या गरेलगत्तै गाउँमा आगजनी गर्नुका साथै लुटपाट समेत गरेको अन्तर्रा्ष्ट्रिय समाचार संस्थाहरुले जनाएका छन् । घटनाको कसैले पनि जिम्मा नलिएको सरकारी अधिकारीहरुले जनाएका छन् ।

गत मार्चमा भएको आक्रमणमा पनि एक सय ५० जनाको मृत्यु भएको थियो । पश्चिमी अफ्रिकाको सेहल क्षेत्रमा फैलिएको जातिय हिंसाका कारण मृत्यु हुनेको संख्या बढ्दै गएपछि संयुक्त राष्ट्रसंघलगायत विभिन्न निकायले चिन्तासमेत व्यक्त गरेका छन् ।

सरकारी अधिकारीहरुले विद्रोही जातिय समूह डोगललाई दोषी ठहर्‍याएपनि उक्त समूहरुले सरकारी आरोपको खण्डन गर्दै आएको छ । एजेन्सी